|
Spiller un siene olen Buddels
“Anno achteinhunnert un Kruuk,
as dat noch keen Buddels geev”, düssen olen Spröök hett´n fröher öfters mol to hörn krägen. Ick dach mol jüst wedder doran, as nülich uns krööger “Spiller” een Barg Buddels vun´n  Böhn holt harr. Up´n Mondaag, as sien Kroog ümmer sloten is, weer he up dan Spieker vun de Perstall togang, dat hüt lerrig näven sien Kroog steit. Mi geit dat hüt um de Buddels ut Ton un Glas, de de Krööger upstöbert hett; deelwies sünd se all över hunnertsößtig Johr old.
Ick kann mi so recht vörstellen, as “Spiller” - dat is de ole Huusnom - dor up´n böhn iné vergohne Tiet rumkromt hett. Hett dorbi an sien Öllern un Grootöllern dacht, an de Lüüd, de fröher up´n Hoff west sünd, an dat Läven, wat sick dor in dan Kroog för binoh dreehunnert johr avspält het. - Un denn fünn he de buddels up´n Spieker, ok´n poor Krööge, de villicht noch öller sünd.
Jeret Stück harr sien Geschichte, meen Gerhard, as he mi een poor Doog löter de Buddels wiesen dä. Dor weern 160 Johr ole handdreihte Tonbuddels dorbi vun Klappenbach, Herker un Crinitz. Krööge uté gliecke Tiet. Noms wi “Königlich Preußische Brunnenverwaltung, Nassau”, “Apollinaris-Brunnen” und “Georg Kreuzberg” Ahrweiler, Rheinpreußen”. Ene ganze Reeg Glasbuddels för Beer un Brause mit Schnappverschluß.
An all de välen Noms kunn een wetten, wi old de Buddels sünd. Dor stünn ok “Herzogliches Hof-Brauhaus, Braunschweig” - “Heinrich Behn, Uelzen” - “Emil Häusemann, Biergroßhandel, Uelzen” - “A. Babatz, Uelzen” - “Bürgerliches Brauhaus Uelzen” und “Uelzener Bierbrauerei-Gesellschaft”. De Schrift weern aver keene Etiketten, nee, de werr in dan Ton orre in dat Glas inbrennt.
Nu weet ick nich recht, wan dat de eersten Buddels gäm hett, aver ick meen, düsse mött welke vun de eersten sien. Eeen unner jüm harr mi dat andohn, de ünnen, wo de Nom “Klappenbach” steiht; ehr eegenordige Form, dat düstere Glas ub de grooten Bookstaben. So een Buddel mutt dormols teemlich düür west sien, sünst harrn se jo woll nich dan Nom inbrennen loten.
So ännert sick de Tiet, doch ümmer denkt´n girn mol wedder torügg, doran, wi´t fröher west is. Jüst so doran, as de Beerkutscher noch mit Peer un Wogen ut de Stadt över´t Lann trecken dän. De Buddels bi´n Krööger “Spiller” in Seborg tüggt dorvun; een sütt jüm dat Öller an ut de Tiet “Anno achtteinhunnert un Kruuk, as et de eersten Buddels geev”!
 Hinnerk Voigts
|
|
